أهم النصائح التى يجب معرفتها قبل شراء السيراميك

اولا: الخامات المصنع منها البلاط :-

بالنسبة لأنواع الفرز هيا هيا بكل الظروف ، يعنى متفكرش ان دى خامة ودى خامة لاء هيا نفس الخامات ونفس الشغل البلاطة الفرز الاول بتكون جنبها الفرز التانى ع الخط او الفرن. 

طيب نختار ايه اول ولا تانى ؟؟ 

هقولك بالأرضيات التانى كويس جدا لأن غالبا العيوب اصلا مش هتعرفها ومش هتشوفها بعد التبليط لأن الارضيات بعيدة عن العين لكن لو تقدر تجيب أول دا يرجعلك.
وفي الحوائط انت وقدرتك ، التانى كويس وعيوبة احنا بس اللى نلاحظها عشان شغالين بالصناعة وبتكون عيوب طفيفة لكن لو عندك قدرة مادية تشترى اول يكون أفضل بالحوائط الكلام للي بيخاف من التانى ليكون فيه مشاكل تخوفة.

الخلاصة:

مفيش فروقات في الخامات من الفرز الأول او التانى او التالت او الرابع و حتي الهالك في الشركة الواحدة ( لكن لكل شركة تركيبتها الخاصة وخامتها المختلفة عن الشركات الأخري) يعنى الكلام لما تستقرعلى موديل اجيبه اول ولا تانى فقط.

ثانيا: وصف عيوب البلاط :-

اول شيئ الكلام ع الفرز الاول والتانى المفروض العيوب دى متكونش موجودة فيهم.

اهم 4 عيوب تاخد بالك منهم :-

1- فرق المقاسات 

ودى ممكن تكتشفها انك تجيب كرتونة كاملة وتاخد البلاط وترصة زى مكان بالكرتونة على سطح مستوى وتحط فوق مسطرة عليهم مع بعض وتلاحظ ان كان فيه اى ضوء بيمر من بين احد البلاطات والمسطرة ، لكن لو عندك قدمة قياس أو بوكليز قياس طبعا دى هتوضح اكتر .

2- التقوس 

ودى بنفس الطريقة اللي فاتت بالرص لكن كل بلاطة عكس الاخري بمعنى الوش بالوش والظهر بالظهر لو فيه تقوس هيظهر مسافات بين البلاط وتماس بالاطرف فقط ، والطريقة التانية انك تحط اضلاع البلاطة على شعاع البصر عشان تشوف استقامتهم ودى الأوضح .

3- التونات واختلاف درجات اللون 

ودة معناها انك ممكن تلاقي بلاطة غامقة وبلاطة فاتحة لنفس الموديل وتعرفها بانك تاخد بالك هل البائع باع ليك الكمية كلها تون واحد ولا تونات مختلفه من البيانات اللي مطبوعة ع الكرتونة ولو فيه تونات مختلفة ككميات ممكن تنسق توزيعها بالغرف لكن اللي بقصدة تونات بالكرتونة الواحدة او التون الواحد ، ودى تعرفها عن طريق فتح كرتونة كامل او اتنين وترصهم ع الارض وتشوف هل البلاط كله درجة واحدة باللون ولا فيه بلاطة اغمق وافتح ؟ طيب لو لقيت فرق عشان تتأكد من الفرق دة بدل وضع البلاط المختلف اعكسة مع الاغمق او الافتح اذا استمر الفرق واضح يبقي فيه درجات مختلفة لكن لو تبدل الفرق بتبديل البلاطة فدة اختلاف اضاءة فقط والبلاط مفيش فيه تونات ( لكن يستثنى من ذلك بعض التصميمات اللى بتكون عبارة عن مقاطع مختلفة داخل البلاطة دى تصميمها كدا وبتكون فى الرخامى والخشب لتحاكى الشكل الطبيعي المختلف والمتغير من قطعة لأخرى فى الخشب أو الرخام ).

4- تتأكد ان الفرز فعلا مطابق يعنى الاول مفيش فيه عيوب فعلا والتانى عيوبة مش ملحوظة ودى هنتكلم عنها بنقطة منفصلة وقبل متشتري تتأكد من البائع ان لو ظهر مشكلة وعيوب تصنيع بعد التركيب فيه معاينة من الشركة والتعويض ان وجدت مشكلة

ثالثا: عيوب السطح :-

1- النمش :- والنمش عبارة عن ثقوب صغيرة جدا على سطح البلاطة.

2- الدبابيس :- عبارة عن ثقب غائر بسطح البلاطة عمقه أعمق من النمش. 

3- الغليان :- عبارة عن فقعات صغيرة بسطح البلاطة منها اللي اتفتحت ومنها المقفوله اللي لو ضغط عليها بأي شيء حاد تتكسر. 

التلات مشاكل اللي فاتوا مشكلتهم انهم بيجمعوا اتساخ بيصعب تنظيفه ببعض للحالات. 

4- عيوب الطباعة :- ودى تظهر لما تشوف عدد من البلاطات جنب بعض هل الطباعة منتظمة ولا فية ترحيل وعدم انتظام بالطباعة العادية (السلك سكرين) او خطوط طولية بالطباعة الإنك جيت او اختلاف درجات الألوان. 

5- الشروخ :- ودى بتكون واضحة بسطح البلاط خصوصا على الأطراف بيكون فيه الجليز غائر (فرز تالت). 

6- لممان الجليز :- يتواجد بأجزاء من سطح البلاطة خصوصا الاطراف الجليز حصل فيه تجميع بنقطة معينة وكشف الجزء اللي بجوارها. 

7- التقشير :- عبار عن تقشير الجليز وانفصاله عن البطانة او جسم البلاطة. 

8- التشقق الابري :- وده مبيكونش ظاهر اوى إلا لو دققت فيه كويس وطريقة كشفة بتكون عن طريق صبغة اى لون بمياه بيتمسح بيها سطح البلاطة لو فيه تشقق هيسحب من الصبغة وهيظهر التشقق ودة بيكون غالبا بسطح الجليز وسببة عدم توافق تمدد وانكماش الجليز مع البودى (فرز تالت). 

9- عضعضة :- دى بتكون ناتجة عن عيوب كبس وبتكون عبارة عن عدم انتظام الحواف بسبب عيوب بفورم المكبس.
10- الرايش :- عبارة عن رايش اسود على سطح البلاطة واحيانا الوان اخرى وبتكون بشكل غير منتظم بالبلاطة وبيكون بسبب الفرن غالبا أو رواسب بالخامات. 

11- الخشونة بالجليز المط:- دى بتكون في البلاط المط والسبب عدم انصهار الجليز جيدا ومشكلتها ان تنظيفها صعب وتعرفها بان لو اى مكان بالبلاطة خشن عرضته لاتساخ وحاولت تمسحة فمكان مسحه صعب. 

12- التصديف :- ودا عبارة عن تجعيد بسطح الجليز اللامع بشكل واضح بيكسر الضوء عليه والحكم عليها بقى حسب ماتراه انت لكن كلما كان السطح مفرود زى الزجاج بيكون شكل البلاط أجمل خصوصا بالحوائط.

العيوب دى كلها المفروض متكونش موجودة بالفرز الاول وبعضها خفيف جدا بالفرز التانى وبتزيد حجمها بالفرز الثالث. 

رابعاً: تحديد احتياجاتك من السيراميك :-

1. لازم تاخد مقاساتك مضبوطة جدا لكل مكان على حدة يعنى الصالة لوحدها كل غرفة لوحدها والحمام والمطبخ والطرقات كل شيئ لوحده لأن وأنت بتشترى ممكن تلاقى حاجة عجباك والكمية مش هتكفي فبتجيب مثلا منها للصالة وحاجة تانية للغرف والمطبخ شيئ والحمام شئ وهكذا.
2. زود من احتياجك الفعلى بحدود 5% من الكمية لو هتبلط بشكل عادى وتزود اكتر شوية لو هتعمل شغل تقطيع وأشكال بالتبليط لأن الهدر بيزيد مع كثرة التقطيع. 
3. اعمل حسابك تحتفظ بعد التبليط بكميات من كل موديل وليكن متر أو اتنين من كل موديل ودا مش لازم يعنى بس ينصح بيه عشان لو حصل كسر او احتاجت تكسر بمكان بلاعة او ماسورة مياه بعد كدا لمشكلة ما مش هتلاقى نفس الموديل وتون اللون فلو جبت اى شيئ تانى هيكون واضح الفرق لكن وجود كميات معاك ممكن تستخدمها فيما بعد فى اصلاح اى كسور بدون ما تتعب وتلف وتدور او تغير كمية كبيرة. 
4. أنصح بشراء سكلو جاهز بدلا من تقطيع بلاط للسيفل اللى تحت الجاهز شكلة أرقى وغالبا أوفر التقطيع شكلة مش حلو وكمان اللى بيبلط هيزود اجرة عشان التقطيع غير ان ممكن يهدر معاك لو البلاط قوى شوية وبتحسب كمياتك من السكلو دا بقياس محيط الحيطان كلها (متر طولى) وبيتباع بالمتر الطولى. 
5. لما تختار مط فى المطبخ خلى بالك ملمسة يكون ناعم مش خشن جدا عشان تنضفة بسهوله. 
6. الحمامات يفضل مط ويفضل لو عليه طبقة بروتكشن حماية بتكون طباعة بارزة أو البلاطة نفسها فورمة فيها مجزعة ودا بيقلل من التزحلق ع البلاط. 
7. فى الشقق البورسلين مش هيضيف مميزات ليك زي القوة والتحمل مثلا لكن هتستفاد بلمعانه العالى لكن يفضل لو هتشترى لمكان فى احتكاك وحركة دائم زى الطرقات والمحلات مثلا يفضل البورسلين ولا ينصح بالسيراميك.